2014(e)ko maiatzaren 29(a), osteguna

BERAKO BESTAK: EGITARAUAREN AZALERAKO LEHIAKETA ETA BERAKO OIHUA

Berako Bestatako Egitarauaren Azalean agertuko den irudia aukeratzeko egiten den lehiaketa hasia da jada. Irudiak aurkezteko epea ekainaren 27rarte dago irekia eta oinarriak argitaratuak daude www.berakoagenda.net webgunean. Bertzeak bertze, irudia paperean aurkeztu beharko da eta 18 x 27 zentimetro neurtu beharko ditu, euskarri gogor batean eman behar delarik. Saria bakarrari emanen zaio, eta 400 euroko eskupekoaz gain, irabazlearen lana 2014. Berako Bestatako Egitarauaren azalean agertzea da irabazteko dagoena.

Joan den urteko Egitarauaren azaleko irudia, Argi Agarak egina.
Bertzalde, Bestatako egitarauarekin batera datorren "Berako Oihua" aldizkarian lanak aurkezteko epea ere irekia dago, ekainaren 27rarte baita ere. Idatziak edozein gaiei buruzkoak izan daitezke, betiere Berako herriarekin harremanik badu; luzeerak gehienez ere bi orrialdekoa izan beharko luke eta edozein irudi edo argazki atxikitzen ahal zaie. Lanak posta elektronikoz bidali beharko dira kultura@berakoudala.net helbide elektronikora, baina badago zuzenean Kultur Etxera eramiteko aukera ere, euskarri digitalean. 

Berako Udalak testuak euskaraz idaztera animatzen ditu herritarrak, eta jakinarazten du, izazlan guztiak sartzeko lekurik izan ezean, euskaraz idatzitakoek lehentasuna izanen dutela.

Testuarekin batera egilearen izen-abizenak eta nortasun agiria eman beharko dira, eta aldizkarian izena agertuko da nahitaez, goitizenak ere gehitzen ahal direlarik, baita elkarte edo erakunde baten izena ere, haien ordezkaritzan idazten den kasuan.

Ez da onartuko pertsona edo talderen bat mindu edo irain dezakeen testurik, eta Berako Udalak eta Berako Kultur Batzordeak testu horiek baztertzeko eskumen osoa izanen dute. Bi erakunde hauek ez dute zertan bat etorri Berako Oihuan argitaratutako iritziekin.

GURE ESKU DAGO ELKARRETARATZEA LIZUNIAGAN

Larunbatean elkarretaratzea eginen da Erabakitzeko Eskubidearen alde Lizuniagan

2014(e)ko maiatzaren 20(a), asteartea

GAZTE EGUNA LARUNBATEAN

Larunbat honetan ospatuko da 10. Berako Gazte Eguna, maiatzaren 24an. Egun honen berri emateko Kartel lehiaketarako deialdia egin zen eta bideo bat ere argitaratua izan da sarean. Aspaldian ez bezala, aurten kontzertuak ostatuetan izanen direla nabarmentzekoa da. Antolatzaileek mozorroekin agertzeko deita egiten dute goizeko 10etan altxaferoarekin hasiko den eta jada herri honetan ohikoa den besta hontara.
Aurtengo Gazte Eguna iragartzen duen kartela

2014(e)ko maiatzaren 7(a), asteazkena

GURE ESKU DAGO EGUNA: MOSAIKO ERRALDOIA



Heldu den larunbaterako, maiatzak 10, Gure Esku Dago eguna antolatu du Berako taldeak. Joan den martxoaren 21ean egin zen aurkezpenaren ondotik, taldea osatzeko bilerak egiten hasi ziren, bertzeak bertze larunbat honetan eginen den ekimena antolatzeko. Egitaraua arratsaldeko 16.30etan hasiko da, kiroldegi aurrean, haurrentzako jokoekin. 18etan izanen da musikaz alaituriko poteo herrikoian parte hartzeko aukera, 19etarako Berako Herriko Etxeko Plazan Mosaiko erraldoia osatzeko asmoarekin. Argazkia ateri ondotik pintxoak, sagardoa eta musika izanen dira, baita Giza Katearen parte izateko metroa eta kamisetak erosteko aukera.

http://izparringia.net/wp-content/uploads/2013/06/Esku.png
Taldeak herritarrak parte hartzera animatzen ditu , Erabakitzeko Eskubidea denon esku dagoela adieraziz.


2014(e)ko maiatzaren 6(a), asteartea

BESTATAKO HERRI BAZKARIA ANTOLATZEKO BILERA

Aurreko besta batzordean Berako Bestatan egiten den Herri Bazkaria antolatu ahal izateko talde bat osatzea proposatu zen. Bertara herriko kuadrila ezberdinak zein gaian interesa duen edonor hurbildu daiteke. Helburua Herri Bazkaria partehartzaileagoa izatea izan badaiteke ere, modu honetan herritarrei nahi duten gisako bazkari bat antolatzeko modua izanen dute. Bertzalde, aspaldian zaharkituta zirudien formatuari aldaketa emateko aukera ikusten da, baita kuadrilen arteko harremana sustatzekoa ere. Bilera gaur ilunabarrean izanen da, maiatzak 6, asteartea, 19tan Beralandetan.  

Hurrengo Besta Batzordea maiatzaren 13an izanen da, 19tan Beralandetan eta honetara ere edozein hurbildu daiteke bestatako programari buruz jakitera, eztabaidatzera eta erabakitzera. 

Herri bazkariaren ondotik egiten den kalejiraren irudi bat